വായുമലിനീകരണത്തിലും ഇന്ത്യ വിശ്വഗുരുവാകാനാണോ ലക്ഷ്യം? മോദി സർക്കാരിനെതിരെ രൂക്ഷ വിമർശനവുമായി ഖാർഗെ

ഡൽഹിയിൽ ശ്വസിക്കാൻ പോലും കഴിയാത്തവിധം വായുമലിനീകരണം രൂക്ഷമാകുമ്പോൾ കേന്ദ്രസർക്കാരിനെതിരെ വിമർശനവുമായി കോൺഗ്രസ് അധ്യക്ഷൻ മല്ലികാർജുൻ ഖാർഗെ. ലോകത്തിന് മാതൃകയാകുമെന്ന് അവകാശപ്പെടുന്ന ഇന്ത്യ വായുമലിനീകരണത്തിന്റെ കാര്യത്തിൽ എന്തുകൊണ്ടാണ് ‘വിശ്വഗുരു’ ആകുന്നതെന്നാണ് ഖാർഗെയുടെ ചോദ്യം.

മലിനീകരണം നിയന്ത്രിക്കുന്നതിൽ മോദി സർക്കാർ ഫലപ്രദമായ നടപടികൾ സ്വീകരിക്കുന്നില്ലെന്നും പേരിനുമാത്രമുള്ള പ്രഖ്യാപനങ്ങളും പരസ്പരം പഴിചാരലുകളുമാണ് നടക്കുന്നതെന്നും അദ്ദേഹം ആരോപിച്ചു. ശുദ്ധവായു ലഭിക്കുക എന്നത് സർക്കാർ നൽകുന്ന ഔദാര്യമല്ലെന്നും ഓരോ പൗരന്റെയും മൗലികാവകാശമാണെന്നും എക്സിലെ കുറിപ്പിൽ ഖാർഗെ വ്യക്തമാക്കി.

ഡൽഹിയിലെ വായുഗുണനിലവാര നിരീക്ഷണ കേന്ദ്രങ്ങളിലെ കണക്കുകളാണ് ഖാർഗെ പ്രധാനമായും ചൂണ്ടിക്കാട്ടിയത്. കഴിഞ്ഞ വർഷം വായുഗുണനിലവാര നിരീക്ഷണ കേന്ദ്രങ്ങൾക്ക് സമീപം വാട്ടർ ടാങ്കറുകൾ ഉപയോഗിച്ച് വെള്ളം തളിച്ചിരുന്നതായും മലിനീകരണ കണക്കുകൾ കുറച്ചുകാണിക്കാനുള്ള ശ്രമമായിരുന്നു അതെന്ന ആരോപണം ഉയർന്നിരുന്നതായും അദ്ദേഹം ഓർമിപ്പിച്ചു.

ഇത്തവണ മലിനീകരണം അതിരൂക്ഷമായ സമയത്ത് ഡൽഹിയിലെ 59 നിരീക്ഷണ കേന്ദ്രങ്ങളിൽ 36 എണ്ണത്തിലും പി.എം. 2.5 കണക്കുകൾ ലഭ്യമല്ലാതായെന്നാണ് ഖാർഗെയുടെ ആരോപണം. ദീപാവലി രാത്രിയിൽ മലിനീകരണം ഉയർന്ന സമയത്തുണ്ടായ ഈ വിവരശേഖരണത്തിലെ വിടവുകൾ വലിയ ചർച്ചയായിട്ടുണ്ട്. അതേസമയം, കാണാതായ കണക്കുകളിൽ ഭൂരിഭാഗവും പിന്നീട് ഡൽഹി മലിനീകരണ നിയന്ത്രണ സമിതി പുറത്തുവിട്ടു. ചിലയിടങ്ങളിൽ പി.എം. 2.5 നില 3,744 മൈക്രോഗ്രാം വരെ ഉയർന്നതായും റിപ്പോർട്ടുകളുണ്ട്.

കഴിഞ്ഞ 12 വർഷമായി പ്രധാനമന്ത്രി നരേന്ദ്ര മോദി വായുമലിനീകരണ വിഷയത്തിൽ പ്രസംഗങ്ങളിൽ മാത്രമാണ് നടപടികൾ ഒതുക്കുന്നതെന്നും ഖാർഗെ കുറ്റപ്പെടുത്തി. 2019 മേയ് എട്ടിന് പ്രധാനമന്ത്രി വായുമലിനീകരണത്തെ വലിയ വെല്ലുവിളിയായി പ്രഖ്യാപിച്ചിരുന്നുവെന്നും എന്നാൽ അതിനുശേഷം കാര്യമായ നടപടികളുണ്ടായില്ലെന്നുമാണ് അദ്ദേഹത്തിന്റെ ആരോപണം. ഡൽഹി-ദേശീയ തലസ്ഥാന മേഖലയിൽ മാത്രമല്ല, ഉത്തർപ്രദേശ്, ബിഹാർ, ഹരിയാന, പഞ്ചാബ്, രാജസ്ഥാൻ തുടങ്ങിയ സംസ്ഥാനങ്ങളിലെ ജനങ്ങളും ശുദ്ധവായു ലഭിക്കാതെ ദുരിതമനുഭവിക്കുകയാണെന്നും അദ്ദേഹം ചൂണ്ടിക്കാട്ടി.

‘രാജ്യത്തിന് ഹവാ കാ ഹിസാബ് നൽകാൻ മോദിജി ധൈര്യം കാണിക്കുമോ?’ എന്ന ചോദ്യത്തോടെയാണ് ഖാർഗെ തന്റെ വിമർശനം അവസാനിപ്പിച്ചത്. അതേസമയം, നിരീക്ഷണ കേന്ദ്രങ്ങളിലെ വിവരങ്ങൾ ലഭ്യമാകാതിരുന്നതിന് സാങ്കേതിക തകരാറുകളാണ് കാരണമെന്നാണ് സർക്കാർ വൃത്തങ്ങൾ വിശദീകരിച്ചിട്ടുള്ളത്. മലിനീകരണത്തിന്റെ യഥാർഥ തോത് കൃത്യമായി നിരീക്ഷിക്കുന്നതിനും പൊതുജനങ്ങൾക്ക് വിശ്വസനീയമായ വിവരങ്ങൾ ലഭ്യമാക്കുന്നതിനും കൂടുതൽ നടപടികൾ ആവശ്യമാണെന്ന ചർച്ചയും ഇതോടെ ശക്തമായിരിക്കുകയാണ്.