കളമശ്ശേരി പീഡനക്കേസ്: അതിജീവിത ഇപ്പോഴും കടുത്ത ട്രോമയിൽ; കുറ്റക്കാരെ വെറുതെ വിടില്ലെന്ന് മന്ത്രി ബിന്ദു കൃഷ്ണ
ആലപ്പുഴ: കളമശ്ശേരി പീഡനക്കേസിലെ അതിജീവിത ആരോഗ്യനില വീണ്ടെടുക്കുകയാണെങ്കിലും കടുത്ത മാനസികാഘാതത്തിൽനിന്ന് പൂർണമായി മുക്തയായിട്ടില്ലെന്ന് മന്ത്രി ബിന്ദു കൃഷ്ണ. തൊഴിൽ വാഗ്ദാനം നൽകി വിളിച്ചുവരുത്തി പെൺകുട്ടിയെ ചൂഷണം ചെയ്തവർക്കെതിരെ ശക്തമായ നടപടി സ്വീകരിക്കുമെന്നും കുറ്റക്കാരെ സർക്കാർ വെറുതെ വിടില്ലെന്നും മന്ത്രി വ്യക്തമാക്കി. അതിജീവിതയെ സന്ദർശിച്ചശേഷം സംസാരിക്കുകയായിരുന്നു അവർ.
‘ഓപ്പറേഷൻ തൂഫാൻ’ ശക്തമായി മുന്നോട്ടുപോകുന്നുണ്ടെങ്കിലും ഇതിനു പിന്നിൽ പ്രവർത്തിക്കുന്ന ചിലർ ഇപ്പോഴും മറവിൽ ലഹരി ഇടപാടുകളിലും മറ്റ് കുറ്റകൃത്യങ്ങളിലും ഏർപ്പെടുന്നുണ്ടെന്ന് മന്ത്രി പറഞ്ഞു. ഇത്തരക്കാർക്കെതിരെ കർശന നടപടി സ്വീകരിക്കുമെന്നും അവർ വ്യക്തമാക്കി.
അതേസമയം, കേസിലെ ഒന്നാം പ്രതിയായ ശ്രീരാജ് സ്പായുടെ മറവിൽ പെൺകുട്ടികളെ ഉപദ്രവിക്കുന്നത് പതിവാക്കിയിരുന്ന ക്രിമിനലാണെന്ന് പൊലീസ് അറിയിച്ചു. ഏറെ നാളായി ഇയാളുടെ നേതൃത്വത്തിൽ കുറ്റകൃത്യങ്ങൾ നടന്നുവരികയായിരുന്നുവെന്ന് എസിപി ബിജോയ് ചന്ദ്രൻ വ്യക്തമാക്കി.
കേസിൽ അറസ്റ്റിലായ ശരണ്യയും ശ്രീരാജിന്റെ കെണിയിൽ വീണതാണോയെന്ന് സംശയിക്കുന്നതായി പൊലീസ് അറിയിച്ചു. നിരവധി പാവപ്പെട്ട പെൺകുട്ടികളെ പ്രതികൾ കുടുക്കിയിട്ടുണ്ടെന്നാണ് പൊലീസിന്റെ വിലയിരുത്തൽ. കേസുമായി ബന്ധപ്പെട്ട് കൂടുതൽ അന്വേഷണം തുടരുകയാണ്.
