പറവൂരിൽ ആവേശമായി വി.ഡി. സതീശൻ! പ്രവർത്തകരുടെ അകമ്പടിയോടെ പത്രിക സമർപ്പിച്ചു
പറവൂരിൽ നിന്ന് വീണ്ടും ജനവിധി തേടുന്ന പ്രതിപക്ഷ നേതാവ് വി.ഡി. സതീശൻ ആവേശകരമായ അന്തരീക്ഷത്തിൽ നാമനിർദ്ദേശ പത്രിക സമർപ്പിച്ചു. പറവൂരിലെ കോൺഗ്രസ് ആസ്ഥാനമായ രാജീവ് ഭവനിൽ നിന്ന് നൂറുകണക്കിന് പ്രവർത്തകരുടെ അകമ്പടിയോടെ കാൽനടയായാണ് അദ്ദേഹം അഡീഷണൽ തഹസിൽദാർ ഓഫീസിലെത്തിയത്. മുദ്രാവാക്യം വിളികളുമായി പ്രവർത്തകർ പത്രികാ സമർപ്പണം ആഘോഷമാക്കി മാറ്റി.
പ്ലാച്ചിമട സമര സമിതിയാണ് വി.ഡി. സതീശന് തെരഞ്ഞെടുപ്പിൽ കെട്ടിവെക്കാനുള്ള തുക കൈമാറിയത് എന്നത് ശ്രദ്ധേയമായി. ജനകീയ സമരങ്ങളോടുള്ള അദ്ദേഹത്തിന്റെ ഐക്യദാർഢ്യത്തിനുള്ള അംഗീകാരമായാണ് ഇതിനെ രാഷ്ട്രീയ കേന്ദ്രങ്ങൾ വിലയിരുത്തുന്നത്. നാമനിർദ്ദേശ പത്രിക സമർപ്പിക്കാനുള്ള അവസാന ദിവസമായ ഇന്ന് വി.ഡി. സതീശന് പുറമെ മറ്റ് പ്രമുഖ സ്ഥാനാർത്ഥികളും പത്രിക നൽകി.
പറവൂരിൽ വൻ ഭൂരിപക്ഷത്തോടെ താൻ വീണ്ടും വിജയിക്കുമെന്ന് പത്രികാ സമർപ്പണത്തിന് ശേഷം അദ്ദേഹം മാധ്യമങ്ങളോട് പ്രതികരിച്ചു. യുഡിഎഫിന്റെ വിജയസാധ്യതകളെക്കുറിച്ചും സർക്കാരിനെതിരായ വികാരം വോട്ടായി മാറുമെന്നും അദ്ദേഹം ആത്മവിശ്വാസം പ്രകടിപ്പിച്ചു. പത്രികാ സമർപ്പണത്തോടെ മണ്ഡലത്തിൽ തെരഞ്ഞെടുപ്പ് ആവേശം കൊടുമുടിയിൽ എത്തിയിരിക്കുകയാണ്.
