പാകിസ്ഥാൻ പതാകകളുടെയും അനുബന്ധ ഉൽപ്പന്നങ്ങളുടെയും വിൽപ്പനയുമായി ബന്ധപ്പെട്ട് ആമസോൺ ഇന്ത്യ, ഫ്ലിപ്കാർട്ട് എന്നിവയുൾപ്പെടെ നിരവധി ഇ-കൊമേഴ്‌സ് കമ്പനികൾക്ക് കേന്ദ്ര ഉപഭോക്തൃ സംരക്ഷണ അതോറിറ്റി (സിസിപിഎ) നോട്ടീസ് അയച്ചു. പാകിസ്ഥാൻ പതാകകളുടെയും ഉൽപ്പന്നങ്ങളുടെയും വിൽപ്പന അനുവദിക്കില്ലെന്ന് യുബുകൈ ഇന്ത്യ, എറ്റ്സി, ദി ഫ്ലാഗ് കമ്പനി, ദി ഫ്ലാഗ് കോർപ്പറേഷൻ എന്നിവയ്ക്ക് നൽകിയ നോട്ടീസുകളിൽ റെഗുലേറ്ററി ബോഡി അറിയിച്ചു. അത്തരം വസ്തുക്കൾ അവരുടെ പ്ലാറ്റ്‌ഫോമുകളിൽ നിന്ന് നീക്കം ചെയ്യാൻ കമ്പനികൾക്ക് നിർദ്ദേശം നൽകിയതായും ആണ് റിപ്പോർട്ട്. ഉപഭോക്തൃ കാര്യ മന്ത്രി പ്രഹ്ലാദ് ജോഷി ആണ് ഇത് സംബന്ധിച്ച് സംസാരിച്ചത്.
“പാകിസ്താൻ പതാകകളുടെയും അനുബന്ധ ഉൽപ്പന്നങ്ങളുടെയും വിൽപ്പനയുമായി ബന്ധപ്പെട്ട് @amazonIN, @Flipkart, @UbuyIndia, @Etsy, The Flag Company, The Flag Corporation എന്നിവയ്ക്ക് സിസിപിഎ നോട്ടീസ് അയച്ചിട്ടുണ്ട്. അത്തരം സംവേദനക്ഷമതയില്ലായ്മ അനുവദിക്കില്ല. അത്തരം എല്ലാ ഉള്ളടക്കങ്ങളും ഉടനടി നീക്കം ചെയ്യാനും ദേശീയ നിയമങ്ങൾ പാലിക്കാനും ഇ-കൊമേഴ്‌സ് പ്ലാറ്റ്‌ഫോമുകൾക്ക് ഇതിനാൽ നിർദ്ദേശം നൽകുന്നു” എക്‌സിൽ പങ്കുവെച്ച പോസ്റ്റിൽ കേന്ദ്രമന്ത്രി പറഞ്ഞു.
ആമസോൺ ഇന്ത്യ, ഫ്ലിപ്കാർട്ട് അടങ്ങിയ ഇ-കൊമേഴ്‌സ് സ്ഥാപനങ്ങൾ വിഷയത്തിൽ ഇതുവരെ പ്രതികരിച്ചിട്ടില്ല. ഏപ്രിൽ 22-ന് 26 പേരുടെ മരണത്തിനിടയാക്കിയ പഹൽഗാം ഭീകരാക്രമണത്തിന് പിന്നാലെ ഇന്ത്യയും പാകിസ്താനും തമ്മിലുള്ള ബന്ധം വഷളായിരുന്നു.
ആമസോണിനും ഫ്ലിപ്കാർട്ടിനും പുറമേ, മീഷോ, ഒഎൽഎക്സ്, ട്രേഡ്ഇന്ത്യ, ഫേസ്ബുക്ക്, ഇന്ത്യാമാർട്ട്, വർദാൻമാർട്ട്, ജിയോമാർട്ട്, കൃഷ്ണമാർട്ട്, ചിമിയ, ടോക്ക് പ്രോ വാലി ടോക്കി, മാസ്ക്മാൻ കളിപ്പാട്ടങ്ങൾ എന്നിവയ്ക്കും സർക്കാർ നിരീക്ഷണ സംഘം നോട്ടീസ് നൽകി.