‘കള്ളക്കഥകൾ കോടതിയിൽ പൊളിഞ്ഞു’; അരിയിൽ ഷുക്കൂർ വധക്കേസ് വിധിയിൽ എം.വി. ഗോവിന്ദന്റെ പ്രതികരണം

തിരുവനന്തപുരം: പി. ജയരാജനും ടി.വി. രാജേഷിനും എതിരായ കള്ളക്കഥ കോടതിയിൽ തകർന്നുവെന്ന് സിപിഎം നേതാവ് എം.വി. ഗോവിന്ദൻ. അരിയിൽ ഷുക്കൂർ വധക്കേസിൽ ഇരുവരെയും വെറുതെവിട്ട പ്രത്യേക സിബിഐ കോടതി വിധിക്ക് പിന്നാലെയായിരുന്നു അദ്ദേഹത്തിന്റെ പ്രതികരണം. ലീഗും കോൺഗ്രസും ചേർന്ന് മെനഞ്ഞ കള്ളക്കഥയുടെ അടിസ്ഥാനത്തിലാണ് സിപിഎം നേതാക്കളെ പ്രതിചേർത്തതെന്ന് അദ്ദേഹം ആരോപിച്ചു. കേസിൽ കുറ്റക്കാരെന്ന് കണ്ടെത്തിയ 13 പേരും തുടർനിയമനടപടികളുമായി മുന്നോട്ടുപോകുമെന്നും, അവർ പാർട്ടിയുടെ പ്രധാന കേഡർമാരാണെന്നും, പാർട്ടി ഒപ്പമുണ്ടാകുമെന്നും എം.വി. ഗോവിന്ദൻ വ്യക്തമാക്കി.

പത്മജ വേണുഗോപാൽ ബിജെപി വിട്ട സംഭവം കോൺഗ്രസിന്റെയും ബിജെപിയുടെയും ആഭ്യന്തരപ്രശ്നമാണെന്നും അദ്ദേഹം പറഞ്ഞു. കേരളത്തിലെ യുഡിഎഫ് ബിജെപിക്ക് വേണ്ടിയാണ് പ്രവർത്തിക്കുന്നത്. ഇരുമുന്നണികളും തമ്മിൽ നൂൽവ്യത്യാസം പോലുമില്ലെന്നും, നേതാക്കൾ അങ്ങോട്ടുമിങ്ങോട്ടും മാറുന്നത് സ്വാഭാവികമാണെന്നും അദ്ദേഹം കൂട്ടിച്ചേർത്തു.

അരിയിൽ അബ്ദുൾ ഷുക്കൂർ വധക്കേസിൽ എറണാകുളം പ്രത്യേക സിബിഐ കോടതിയാണ് വിധി പറഞ്ഞത്. കേസിൽ 13 പേർ കുറ്റക്കാരാണെന്ന് കോടതി കണ്ടെത്തി. പി. ജയരാജൻ, ടി.വി. രാജേഷ്, ശ്യാംജിത്ത് എന്നിവരുൾപ്പെടെ 18 പ്രതികളെ കോടതി വെറുതെ വിട്ടു. ഗൂഢാലോചനാക്കുറ്റമായിരുന്നു ജയരാജനും രാജേഷിനുമെതിരെ ചുമത്തിയിരുന്നത്. രണ്ട് പ്രതികൾ വിചാരണയ്ക്കിടെ മരിച്ചിരുന്നു.

കുറ്റക്കാരെന്ന് കണ്ടെത്തിയവരിൽ കൊലപാതകത്തിൽ നേരിട്ട് പങ്കെടുത്ത ഏഴ് പ്രതികൾക്ക് കോടതി ജീവപര്യന്തം തടവ് വിധിച്ചു. ഒന്നാം പ്രതി കെ.വി. സുമേഷ്, മൂന്നാം പ്രതി അനൂപ്, ഏഴാം പ്രതി പവിത്രൻ, ഒമ്പതാം പ്രതി പി.വി. മനോഹരൻ, പത്താം പ്രതി എം.പി. ദിനേശൻ എന്ന മൈന ദിനേശൻ, 12-ാം പ്രതി ബിജുമോൻ എന്ന വടി ബിജു, 15-ാം പ്രതി ഷിജിൽ മോഹൻ എന്നിവരാണ് ജീവപര്യന്തം ശിക്ഷയ്ക്ക് വിധിക്കപ്പെട്ടത്. മൂന്ന് വർഷത്തിൽ താഴെ ശിക്ഷ ലഭിച്ച 14-ാം പ്രതി രാധാകൃഷ്ണൻ, 16-ാം പ്രതി സജിത്, 25-ാം പ്രതി വി.വി. മോഹനൻ, 26-ാം പ്രതി പുരുഷോത്തമൻ, 27-ാം പ്രതി അജിത് കുമാർ, 28-ാം പ്രതി പി.പി. സുരേശൻ എന്നീ ആറ് പ്രതികൾക്ക് കോടതി ജാമ്യം അനുവദിച്ചു.

Related Articles

Leave a Reply

Your email address will not be published. Required fields are marked *

Back to top button