അച്യുതാനന്ദന്റെ മകന്റെ ശമ്പളവിവരം പുറത്തുവിടില്ല; ‘സ്വകാര്യത’ ചൂണ്ടിക്കാട്ടി ഐഎച്ച്ആർഡി

തിരുവനന്തപുരം: മുൻ മുഖ്യമന്ത്രി V. S. Achuthanandanയുടെ മകൻ ഡോ. വി. എ. അരുൺ കുമാർ ഐഎച്ച്ആർഡി ഡയറക്ടർ (ഇൻ-ചാർജ്) ആയിരുന്ന കാലയളവിൽ കൈപ്പറ്റിയ ശമ്പളവിവരം വിവരാവകാശ നിയമപ്രകാരം പുറത്തുവിടാനാകില്ലെന്ന് ഐഎച്ച്ആർഡി വ്യക്തമാക്കി.

ഹൈക്കോടതി അഭിഭാഷകനായ അഡ്വ. കുളത്തൂർ ജയ്‌സിങ് വിവരാവകാശ നിയമപ്രകാരം നൽകിയ അപേക്ഷയ്ക്ക് മറുപടിയായാണ് ഐഎച്ച്ആർഡിയുടെ നിലപാട് വ്യക്തമാക്കിയത്.

അപേക്ഷയിൽ, ഡോ. വി. എ. അരുൺ കുമാർ ഡയറക്ടർ (ഇൻ-ചാർജ്) ആയി പ്രവർത്തിച്ച കാലയളവ്, ഓരോ മാസവും കൈപ്പറ്റിയ ശമ്പളം, ശമ്പളത്തിന് പുറമെ ലഭിച്ച ആനുകൂല്യങ്ങൾ എന്നിവയുടെ വിവരങ്ങളാണ് തേടിയിരുന്നത്.

ഐഎച്ച്ആർഡി പബ്ലിക് ഇൻഫർമേഷൻ ഓഫീസർ ശോഭന എസ് നൽകിയ മറുപടിയിൽ, 2023 ജൂൺ 3 മുതൽ 2026 ജൂലൈ 7 വരെ ഡോ. വി. എ. അരുൺ കുമാർ ഡയറക്ടർ (ഇൻ-ചാർജ്) ആയി പ്രവർത്തിച്ചിരുന്നുവെന്ന് വ്യക്തമാക്കുന്നു. എന്നാൽ ശമ്പളവിവരം വ്യക്തിയുടെ സ്വകാര്യതയുമായി ബന്ധപ്പെട്ടതിനാൽ വിവരാവകാശ നിയമപ്രകാരം നൽകാനാകില്ലെന്നും അറിയിച്ചു.

അതേസമയം, ഡയറക്ടർ (ഇൻ-ചാർജ്) എന്ന അധിക ചുമതലയുമായി ബന്ധപ്പെട്ട് പ്രത്യേക ആനുകൂല്യങ്ങളൊന്നും അദ്ദേഹം കൈപ്പറ്റിയിട്ടില്ലെന്നും ഐഎച്ച്ആർഡി മറുപടിയിൽ വ്യക്തമാക്കി.

ഐഎച്ച്ആർഡിയുടെ നിലപാടിനെതിരെ പ്രതികരിച്ച അഡ്വ. കുളത്തൂർ ജയ്‌സിങ്, സർക്കാർ ഖജനാവിൽ നിന്നുള്ള ചെലവുകളുമായി ബന്ധപ്പെട്ട വിവരങ്ങൾ സ്വകാര്യതയുടെ പരിധിയിൽ വരില്ലെന്നും സർക്കാർ ജീവനക്കാരുടെ ശമ്പളവിവരം രഹസ്യമാക്കി മറച്ചുവയ്ക്കാൻ വിവരാവകാശ നിയമം അനുവദിക്കുന്നില്ലെന്നും അഭിപ്രായപ്പെട്ടു. സ്വകാര്യത സംബന്ധിച്ച വ്യവസ്ഥകൾ തെറ്റായി വ്യാഖ്യാനിച്ചാണ് ഇത്തരം വിവരങ്ങൾ നിഷേധിക്കുന്നതെന്നും അദ്ദേഹം ആരോപിച്ചു.