വയനാട് പുനരധിവാസ ഫണ്ടിൽ ക്രമക്കേട് ആരോപണം; സി.എ.ജി റിപ്പോർട്ട് ചൂണ്ടിക്കാട്ടി സർക്കാരിനെതിരെ ബിജെപി

തിരുവനന്തപുരം: വയനാട് പുനരധിവാസവുമായി ബന്ധപ്പെട്ട ദുരിതാശ്വാസ നിധിയിൽ നിന്ന് 262.06 കോടി രൂപ സഞ്ചിതനിധിയിലേക്ക് ക്രമരഹിതമായി മാറ്റിയതായും ധനകാര്യ മാനേജ്മെന്റിൽ ഗുരുതര പാളിച്ചകളുണ്ടായതായും സി.എ.ജി റിപ്പോർട്ട് തെളിയിക്കുന്നുവെന്ന് ബിജെപി സംസ്ഥാന അധ്യക്ഷൻ Rajeev Chandrasekhar ആരോപിച്ചു.

ദുരിതാശ്വാസ നിധിയിലേക്ക് എത്തിയ കോടിക്കണക്കിന് രൂപ ഇടത് സർക്കാർ വകമാറ്റി ചെലവഴിക്കുന്നുവെന്ന ആരോപണം ബിജെപി നേരത്തേ ഉന്നയിച്ചിരുന്നുവെന്നും, ഇപ്പോൾ പുറത്തുവന്ന കംപ്‌ട്രോളർ ആൻഡ് ഓഡിറ്റർ ജനറൽ (CAG) റിപ്പോർട്ട് ആ ആരോപണങ്ങൾക്ക് ശക്തി പകരുന്നതാണെന്നും അദ്ദേഹം പറഞ്ഞു.

ദുരന്തബാധിതർക്കും ദുരിതമനുഭവിക്കുന്ന സാധാരണ ജനങ്ങൾക്കും അടിയന്തര സഹായം എത്തിക്കേണ്ട മുഖ്യമന്ത്രിയുടെ ദുരിതാശ്വാസ നിധിയിൽ (CMDRF) നിന്ന് 262.06 കോടി രൂപ സഞ്ചിതനിധിയിലേക്ക് മാറ്റിയ നടപടി ഗുരുതരമായ വിശ്വാസവഞ്ചനയാണെന്ന് രാജീവ് ചന്ദ്രശേഖർ വിമർശിച്ചു.

റവന്യൂ കമ്മിയും ധനകമ്മിയും കുറച്ചുകാണിക്കുന്നതിനായി ദുരിതാശ്വാസ നിധി ദുരുപയോഗം ചെയ്തുവെന്നത് ഭരണസംവിധാനങ്ങളെയും ജനങ്ങളെയും കബളിപ്പിച്ച നടപടിയാണെന്ന് സി.എ.ജി കണ്ടെത്തലുകൾ വ്യക്തമാക്കുന്നതായും അദ്ദേഹം പറഞ്ഞു.

കഴിഞ്ഞ പത്ത് വർഷത്തിനിടെ കേരളത്തിന്റെ സാമ്പത്തിക സ്ഥിതി ഗുരുതര പ്രതിസന്ധിയിലേക്ക് നീങ്ങിയതിന്റെ ഞെട്ടിക്കുന്ന തെളിവുകളിലൊന്നാണ് ഈ കണ്ടെത്തലുകളെന്നും, ദുരന്തബാധിതരുടെ പേരിൽ സമാഹരിച്ച തുക സർക്കാർ കണക്കുകൾ മെച്ചപ്പെടുത്താൻ ഉപയോഗിച്ചുവെന്നത് അതീവ ഗൗരവമുള്ള വിഷയമാണെന്നും അദ്ദേഹം ചൂണ്ടിക്കാട്ടി.

വകമാറ്റിയ തുക ഏതെല്ലാം ആവശ്യങ്ങൾക്കാണ് ചെലവഴിച്ചതെന്നും, ഏത് വകുപ്പുകളിലൂടെയാണ് വിനിയോഗിച്ചതെന്നും, അതിന് ഉത്തരവാദികൾ ആരൊക്കെയാണെന്നും കണ്ടെത്താൻ സമഗ്രവും സുതാര്യവുമായ അന്വേഷണം നടത്തണമെന്ന് ബിജെപി ആവശ്യപ്പെട്ടു.

മുഖ്യമന്ത്രിയുടെ ദുരിതാശ്വാസ നിധി വരെ സാമ്പത്തിക കെടുകാര്യസ്ഥത മറച്ചുവയ്ക്കാൻ ഉപയോഗിച്ചെന്ന ആരോപണം ജനാധിപത്യ സംവിധാനങ്ങളോടുള്ള വെല്ലുവിളിയാണെന്നും, സംഭവത്തിൽ ഉത്തരവാദികളായവർക്കെതിരെ നടപടി സ്വീകരിച്ച് മുഴുവൻ വസ്തുതകളും ജനങ്ങൾക്ക് മുന്നിൽ കൊണ്ടുവരണമെന്ന് രാജീവ് ചന്ദ്രശേഖർ ആവശ്യപ്പെട്ടു.