സർക്കാർ ജീവനക്കാർക്ക് ആശ്വാസ സൂചന; ബജറ്റിൽ പെൻഷൻ പ്രായം കൂട്ടില്ല, ഡി.എ പ്രഖ്യാപനം വരും

തിരുവനന്തപുരം: സർക്കാർ ജീവനക്കാർക്കായി ബജറ്റിൽ വൻ പ്രഖ്യാപനങ്ങൾ ഉണ്ടാകുമെന്ന പ്രതീക്ഷകൾക്കിടെ യുഡിഎഫ് സർക്കാർ നിലപാട് വ്യക്തമാകുന്നു. പെൻഷൻ പ്രായം വർധിപ്പിക്കാനുള്ള നീക്കത്തിന് ഈ വർഷം സർക്കാർ തുടർച്ച നൽകാനിടയില്ലെന്നാണ് സൂചന. മുന്നണിക്കുള്ളിലെ എതിർപ്പുകളും സാമ്പത്തിക നേട്ടത്തെക്കുറിച്ചുള്ള വിലയിരുത്തലുകളും പരിഗണിച്ചാണ് തീരുമാനം.

മുഖ്യമന്ത്രിയായ ശേഷം വി.ഡി. സതീശൻ സർക്കാർ ജീവനക്കാർക്ക് ബജറ്റിൽ ‘വിസ്മയം’ ഒരുക്കുമെന്ന വാഗ്ദാനം നൽകിയിരുന്നു. എന്നാൽ പിന്നീട് പുറത്തിറങ്ങിയ ധവളപത്രം ജീവനക്കാരിൽ ആശങ്ക ഉയർത്തിയിരുന്നു. പെൻഷൻ പ്രായം വർധിപ്പിക്കൽ, ശമ്പള പരിഷ്കരണം, കേന്ദ്ര മാതൃകയിൽ പെൻഷൻ സംവിധാനം, 10 വർഷത്തിലൊരിക്കൽ ശമ്പള പരിഷ്കരണം തുടങ്ങിയ നിർദേശങ്ങളാണ് അതിൽ ഉൾപ്പെട്ടിരുന്നത്.

എന്നാൽ പെൻഷൻ പ്രായം കൂട്ടുന്നതിനെതിരെ മുന്നണിക്കുള്ളിൽ തന്നെ ശക്തമായ എതിർപ്പ് ഉയർന്നതോടെ സർക്കാർ ആ നീക്കം പിന്‍വലിക്കാനാണ് സാധ്യത. മെയ് 31-ന് വലിയ തോതിൽ ജീവനക്കാർ വിരമിച്ചതിനാൽ ഈ വർഷം പെൻഷൻ പ്രായം വർധിപ്പിച്ചാലും സാമ്പത്തിക ലാഭം ഉണ്ടാകില്ലെന്നും സർക്കാർ വിലയിരുത്തുന്നു.

അതേസമയം, സർക്കാർ ജീവനക്കാർക്ക് ആശ്വാസമായി ക്ഷാമബത്ത (ഡി.എ) സംബന്ധിച്ച പ്രഖ്യാപനം ബജറ്റിൽ ഉണ്ടായേക്കുമെന്നാണ് സൂചന. ഒരു ഗഡു ഡി.എ മുൻകാല പ്രാബല്യത്തോടെ അനുവദിക്കാനുള്ള തീരുമാനം ആദ്യ ബജറ്റിൽ പ്രഖ്യാപിക്കാനാണ് സാധ്യത. 2021 മുതൽ 2025 വരെയുള്ള 8 ഗഡു ഡി.എ കുടിശ്ശിക ഘട്ടംഘട്ടമായി നൽകുമെന്ന് സർക്കാർ നേരത്തെ അറിയിച്ചിരുന്നു.

ധവളപത്രത്തിൽ പെൻഷൻ പ്രായം 60 ആക്കിയാൽ പ്രതിവർഷം ഏകദേശം 6,000 കോടി രൂപയുടെ ലാഭം ഉണ്ടാകുമെന്ന വിലയിരുത്തലും ഉൾപ്പെട്ടിരുന്നു. എന്നാൽ സംസ്ഥാനത്തെ ഉയർന്ന പെൻഷൻ ബാധ്യതയും ജീവനക്കാരുടെ എണ്ണം കൂടുന്നതും പരിഗണിച്ച് നിലവിൽ ആ തീരുമാനം മാറ്റിവയ്ക്കാനാണ് സാധ്യത.

യുവജന പ്രതിഷേധ സാധ്യതയും രാഷ്ട്രീയ പ്രതികരണങ്ങളും കണക്കിലെടുത്താണ് സർക്കാർ നിലപാട് മൃദുവാക്കുന്നതെന്ന് വിലയിരുത്തപ്പെടുന്നു. കർണാടക മാതൃകയിൽ യുവാക്കൾക്കായി പ്രത്യേക തൊഴിൽ സംവിധാനങ്ങൾ പരിഗണിക്കുന്നതായും റിപ്പോർട്ടുകളുണ്ട്.