ഓപ്പറേഷൻ തൂഫാൻ വൻവിജയം; 137 പേർ അറസ്റ്റിൽ, 500 ഗ്രാം എംഡിഎംഎയും 37 കിലോ കഞ്ചാവും പിടികൂടി
തിരുവനന്തപുരം: കേരള പൊലീസും എക്സൈസ് വകുപ്പും സംയുക്തമായി നടപ്പിലാക്കുന്ന ‘ഓപ്പറേഷൻ തൂഫാൻ’ സംസ്ഥാനത്ത് വൻ വിജയമായതായി സംസ്ഥാന പൊലീസ് മേധാവി Ravada Chandrasekhar അറിയിച്ചു. ലഹരിവിരുദ്ധ പ്രവർത്തനങ്ങളുടെ ഭാഗമായി സംസ്ഥാനത്തെ എല്ലാ ജില്ലകളിലും വ്യാപക പരിശോധനയാണ് നടത്തിയത്.
ഓപ്പറേഷന്റെ ഭാഗമായി രജിസ്റ്റർ ചെയ്ത 104 കേസുകളിലായി 137 പേരെ അറസ്റ്റ് ചെയ്തതായി ഡിജിപി വ്യക്തമാക്കി. പിടിയിലായ പ്രതികളെ വിശദമായി ചോദ്യം ചെയ്ത് ലഹരി വിതരണത്തിന്റെ പ്രധാന ശൃംഖല കണ്ടെത്തി തകർക്കുകയാണ് ലക്ഷ്യമെന്നും അദ്ദേഹം പറഞ്ഞു.
പരിശോധനകളിൽ വിവിധയിടങ്ങളിൽ നിന്ന് 500 ഗ്രാം എംഡിഎംഎയും 37 കിലോ കഞ്ചാവും പിടിച്ചെടുത്തു. സിന്തറ്റിക് ലഹരിമരുന്നുകളുടെ വിതരണത്തിനൊപ്പം മറ്റ് ലഹരിവസ്തുക്കളുടെ വ്യാപാരികളെയും പൊലീസ് വലയിലാക്കിയിട്ടുണ്ടെന്ന് ഡിജിപി അറിയിച്ചു.
പ്രതികളെയും ലഹരി മാഫിയയെയും സംബന്ധിച്ച സാമ്പത്തിക സ്രോതസ്സുകൾ കണ്ടെത്തുന്നതിനും അവരുടെ സാമ്പത്തിക ഇടപാടുകൾ പരിശോധിക്കുന്നതിനുമായി അന്വേഷണം വ്യാപിപ്പിച്ചിരിക്കുകയാണ്. ലഹരി ശൃംഖലയുടെ പിന്നിലുള്ള പ്രധാന സാമ്പത്തിക ഉറവിടങ്ങൾ കണ്ടെത്തുക എന്നതാണ് അടുത്തഘട്ട ലക്ഷ്യമെന്നും അദ്ദേഹം വ്യക്തമാക്കി.
സ്കൂൾ പരിസരങ്ങളിലെ ലഹരി വിൽപ്പന തടയുന്നതിനുള്ള പ്രത്യേക പരിശോധനകളും ഓപ്പറേഷൻ തൂഫാന്റെ ഭാഗമായി ശക്തമാക്കിയിട്ടുണ്ട്. അന്വേഷണത്തിൽ ലഭിച്ച വിവരങ്ങൾ പ്രകാരം കഞ്ചാവ് പ്രധാനമായും ആന്ധ്ര–ഒഡീഷ അതിർത്തി പ്രദേശങ്ങളിൽ നിന്നാണ് കേരളത്തിലേക്ക് എത്തുന്നത്.
അതേസമയം, എംഡിഎംഎ ഉൾപ്പെടെയുള്ള സിന്തറ്റിക് ലഹരിമരുന്നുകൾ ബെംഗളൂരു വഴിയും കരിപ്പൂർ, തിരുവനന്തപുരം വിമാനത്താവളങ്ങൾ വഴിയുമാണ് സംസ്ഥാനത്തേക്ക് കടത്തുന്നതെന്ന് പൊലീസ് കണ്ടെത്തിയിട്ടുണ്ട്. ഈ നെറ്റ്വർക്കുകളുടെ സാമ്പത്തിക ഇടപാടുകളെക്കുറിച്ചുള്ള ആഴത്തിലുള്ള അന്വേഷണം തുടരുകയാണെന്നും ഡിജിപി അറിയിച്ചു.
