കലാലയ സൗഹൃദം പങ്കുവെച്ച് ഉദയനിധിയുടെ കന്നി പ്രസംഗം; പുഞ്ചിരിയോടെ കേട്ട് വിജയ്യും സ്പീക്കറും
ചെന്നൈ: തമിഴ്നാട് നിയമസഭയിൽ പ്രതിപക്ഷ നേതാവായി ചുമതലയേറ്റതിന് പിന്നാലെ ഉദയനിധി സ്റ്റാലിൻ നടത്തിയ ആദ്യ പ്രസംഗം ശ്രദ്ധേയമായി. പതിനേഴാം നിയമസഭയുടെ പ്രതിപക്ഷ നേതാവായാണ് ഡിഎംകെ നേതാവ് ഉദയനിധി സ്റ്റാലിൻ ചുമതലയേറ്റത്.
മുൻ മുഖ്യമന്ത്രി എം.കെ. സ്റ്റാലിന്റെ തോൽവിയെ തുടർന്ന് പ്രതിപക്ഷ നേതൃസ്ഥാനത്തേക്ക് എത്തിയ ഉദയനിധി, തന്റെ കന്നി പ്രസംഗത്തിൽ വ്യക്തിപരമായ അനുഭവങ്ങളും രാഷ്ട്രീയ നിലപാടുകളും ചേർത്ത് സംസാരിച്ചു. സഭയുടെ അന്തസ്സ് ഉയർത്തിപ്പിടിക്കുമെന്ന് അദ്ദേഹം ഉറപ്പുനൽകി.
പ്രസംഗത്തിനിടെ ഭരണ-പ്രതിപക്ഷ നേതാക്കൾ തമ്മിലുള്ള വ്യക്തിപരമായ ബന്ധങ്ങളും അദ്ദേഹം പരാമർശിച്ചു. മുഖ്യമന്ത്രി വിജയ്, സ്പീക്കർ ജെ.സി.ഡി. പ്രഭാകർ എന്നിവരുമായി താനും ചെന്നൈയിലെ ലയോള കോളജിലെ സഹപാഠികളാണെന്നും ഉദയനിധി പറഞ്ഞു. രാഷ്ട്രീയ ഭേദമന്യേ സഹപാഠിത്വവും സൗഹൃദവും നിലനിൽക്കുന്നുവെന്ന് അദ്ദേഹം ചൂണ്ടിക്കാട്ടി.
“ഞങ്ങളുടെ അനുഭവവും അറിവും പങ്കിടാൻ ഞങ്ങൾ തയ്യാറാണ്. തമിഴ്നാടിന്റെ ക്ഷേമമാണ് പ്രധാന ലക്ഷ്യം,” എന്നായിരുന്നു അദ്ദേഹത്തിന്റെ പ്രസ്താവന.
രാഷ്ട്രീയ വ്യത്യാസങ്ങൾ നിലനിൽക്കുമ്പോഴും വികസന വിഷയങ്ങളിൽ ഭരണപക്ഷവുമായി സഹകരിക്കാൻ പ്രതിപക്ഷം തയ്യാറാണെന്ന സന്ദേശമാണ് ഉദയനിധി സ്റ്റാലിന്റെ പ്രസംഗം നൽകുന്നതെന്ന് നിരീക്ഷകർ വിലയിരുത്തുന്നു.
അതിനിടെ, സഭയിൽ നടന്ന പ്രസംഗം മുഖ്യമന്ത്രി വിജയ് പുഞ്ചിരിയോടെ കേൾക്കുന്നതായ ദൃശ്യങ്ങൾ സോഷ്യൽ മീഡിയയിൽ വ്യാപകമായി പ്രചരിക്കുന്നുണ്ട്.
